ҚТЖ жасанды интеллектті сынау үшін цифрлық полигондар ашады

Digital Almaty 2025 халықаралық форумында IDC вице-президенті Андрей Беклемишев «AI жөніндегі жаһандық коалиция: Серіктестік және даму векторы» сессиясында жасанды интеллект нарығындағы жаһандық трендтермен бөлісті. IDC мәліметтері бойынша, жаһандық ЖИ шығындары жылына орта есеппен 30% астамға өсуде, өткен жылы GenAI нарығы екі еседен астам өсті. IDC 2028 жылға қарай AI технологиясының жалпы жаһандық шығындары 620 миллиард АҚШ долларынан асады деп күтеді.

 Андрей Беклемишев «Қазақстан темір жолы» цифрлық полигондар құру туралы бастамасын атап өтіп, Қазақстанда ЖИ-ді табысты қолданудың кейбір мысалдары туралы айтып берді.

Полигондар IT-компаниялар, университеттер мен технопарктер жасанды интеллекттің әртүрлі компоненттерін әзірлеп қана қоймай, оларды теміржол көлігінің нақты жұмыс жағдайларына бейімдей отырып, өз шешімдерін іс жүзінде тексере алатын негізгі алаңға айналады. Қазақстандық шешімдерге басымдық беріледі, бұл отандық технологиялар мен цифрлық тәуелсіздіктің дамуына ықпал ететін болады.

«ҚТЖ» ҰК» АҚ– «Автоматтандыру және цифрландыру дирекциясы» филиалының директоры Мұрат Ахметовтың пікірінше, «Мемлекет басшысы алға қойған міндеттер аясында цифрлық полигондарды құру өндірістік процестерге жасанды интеллектті енгізуді жеделдетуге мүмкіндік береді».

- Бүгінде «Қазақстан темір жолында» цифрландыру, елдің көлік инфрақұрылымының қауіпсіздігі мен тиімділігіне ықпал ететін озық технологияларды пайдалану бойынша белсенді жұмыс жүргізілуде, - деп атап өтті ол.